Eftir mas og bölvað bras
ber ei þrasið trega
en að rasa út í das
alveg Gazalega.
Áramótaávarp
Kveðju vil síðbúna senda
sálum á Fróni er lenda
rummungum í
– og ruglast í því
að hérna er bannað að benda.
Eitthvað rotið í ríki …
Við héldum á hæsta topp
sem hrapalegt reyndist flopp
því kerfið var rotið.
Nú kembum við slotið
með Airwick Odour Stop.
Nóg
Um hátíðarnar við finnum fró
og friðinn í lúnum beinum
þó áfram verði hér yfrið nóg
af allskonar jólasveinum.
Nýju jólin
Nú eru handan við hól
heilnæm og sexý jól
því bruðlið við spörum;
í boðin öll förum
bara klædd sultaról.
Ásdís Rán II
Bý yfir lokkandi línum
sem loka ei niðri í skrínum
en angri nú veldur
hve athygli heldur
uppgerð á vörum mínum.
Nýr Don Juan
Mikið er duflað og dæst.
Ég Don Juan vera læst:
Leita og finn
og læði svo inn
hverju sem hendi er næst.
